വീതിയിലൂടെയും
ഉയരത്തിലൂടെയും
അടയാളപ്പെടുത്താനാവാത്ത
മറ്റനേകം മാനങ്ങളിലൂടെയും
ഞാന്‍ പെരുകുമെന്നും
കത്തിപ്പടരുമെന്നും
പേടിച്ചാണ്
മറ്റെല്ലാ അക്ഷങ്ങളും വെട്ടി മാറ്റി
നീയെന്നെ ഒരു നേര്‍വരയാക്കിയത്
എന്നിട്ടും
മുന കൂര്‍പ്പിച്ച് കൂര്‍പ്പിച്ച്
ഒരു അമ്പാക്കി മാറ്റി
ആകാശത്തേയും തുളച്ചു ഞാന്‍
പറക്കുമെന്നായപ്പോള്‍
പിന്നെയും പകുത്തു പകുത്തു
നീയെന്നെ ഒരു ബിന്ദുവിലൊതുക്കി
ഇനിയുമെന്നെ വെട്ടി മുറിക്കാനോ
മായ്ച്ചു കളയാനോ
നിനക്കാവില്ല
കാരണം
നിന്‍റെ വാക്യങ്ങളെല്ലാം
അര്‍ത്ഥപൂര്‍ണ്ണങ്ങളായി
അവസാനിക്കണമെങ്കില്‍
അടയാളപ്പെടുത്താന്‍
എന്നെത്തന്നെ വേണ്ടേ
നിനക്ക്?
ആഹാ.. മികച്ച സ്ത്രീപക്ഷ രചന..
ReplyDeleteമുന കൂര്‍പ്പിച്ച് കൂര്‍പ്പിച്ച്
ReplyDeleteഒരു അമ്പാക്കി മാറ്റി
ആകാശത്തേയും തുളച്ചു ഞാന്‍
മനോഹരം.. ആശംസ്കൾ
ഫെമിനിസം അല്പം ഉണ്ടോ എന്നൊരു സംശയമില്ലാതില്ല:) പക്ഷെ കവിത ഇഷ്ടപ്പെട്ടു.
ReplyDeleteHa! Beautiful Irony! Loved it!
ReplyDelete